"Hvað ætlar þinn flokkur að gera til að tryggja að hér á landi sé menntastefnunni um skóla án aðgreiningar raunverulega framfylgt?" Þannig hljóðar ein þeirra sex spurninga sem send var til fulltrúa allra stjórnmálaflokka sem bjóða fram til Alþingis. ADHD samtökin eru í hópi 14 hagsmunasamtaka sem standa að sendingu spurningalistans. Tilgangurinn er að koma málinu betur á dagskrá en verið hefur og knýja á um bætta þjónustu við börn með geðrænan vanda, fötlun eða aðra sérstöðu.

ADHD samtökin kynntu í byrjun mánaðar nýtt endurskinsmerki en sala endurskinsmerkja er mikilvægur liður í vitundarmánuði ár hvert. Þar er bæði um að ræða mikilvæga fjáröflun fyrir starfsemi ADHD samtakanna og ekki síður er merkjasölunni ætlað að vekja athygli á málefnum einstaklinga með ADHD. Samtökin leita eftir öflugum sölumönnum til að standa vaktina um komandi helgi.

Þorsteinn Eyþórsson, 62 ára Borgnesingur, kom færandi hendi á dögunum og afhenti ADHD samtökunum afrakstur áheitasöfnunar eftir hringferð um Ísland á reiðhjóli. Steini sagði hringferðina fyrst og fremst hafa verið áskorun fyrir hann sjálfan en um leið vildi hann vekja athygli á ADHD samtökunum og málstað þeirra sem glíma við röskunina.

ADHD samtökin bjóða upp á spjallfund í kvöld - miðvikudaginn 12. október. Fundurinn er ætlaður fullorðnum með ADHD. Hann verður að Háaleitisbraut 13, í fundarsal á 4.hæð og hefst klukkan 20:30. Elín H. Hinriksdóttir leiðir fundinn en yfirskrift hans er "ADHD og náin sambönd". Allir velkomnir, heitt á könnunni og kósý stemmning sem kostar ekkert. Hlökkum til að sjá ykkur sem flest.

ADHD samtökin bjóða upp á spjallfund í kvöld miðvikudaginn 5. október kl. 20:30 fyrir foreldra og forráðamenn að Háaleitisbraut 13. Sólveig Ásgrímsdóttir sálfræðingur leiðir fundinn en yfirskrift hans er "Áhættuhegðun". Allir velkomnir, heitt á könnunni og kósý stemmning sem kostar ekkert. Hlökkum til að sjá ykkur sem flest.

Alþjóðlegur ADHD vitundarmánuður er nú nýhafinn en október er lagður undir vitundarvakningu ár hvert. ADHD samtökin taka virkan þátt í átakinu nú líkt og fyrr með margvíslegum hætti. Nýtt endurskinsmerki var kynnt í dag, tveir nýir fræðslubæklingar voru gefnir út og árlegt málþing samtakanna var kynnt. Málþingið veðrur haldið í lok október og beinist athyglin að föngum og öðrum sem lenda í refsivörslukerfinu.

ADHD samtökin bjóða upp á sjálfsstyrkingarnámskeið fyrir stráka í 8. til 10. bekk. Námskeiðið hefst laugardaginn 22. október 2016 en foreldrakynning verður fimmtudaginn 20. október. Skráningu er lokið.

ADHD samtökin hafa efnt til samstarfs við Ragnhildi Bjarkadóttur og Hjördísi Unni Másdóttur, meistaranema í klínískri sálfræði við Háskólann í Reykjavík. Þær hyggjast rannsaka áhrif kjarnaeinkenna og fylgiraskana ADHD á bjargráð og samskiptafærni í parasamböndum. Óskað er eftir þátttakendum í rannsóknina, pörum sem eru í sambúð og hafa verið í a.m.k. sex mánuði.

Hvatningarverðlaun Öryrkjabandalags Íslands eru veitt þeim sem hafa með verkum sínum stuðlað að einu samfélagi fyrir alla og endurspegla nútímalegar áherslur um þátttöku, sjálfstæði og jafnrétti fatlaðs fólks. Verðlaunin eiga að efla frumkvæði til nýrra verkefna og hugmyndavinnu í málaflokknum og skapa jákvæða ímynd fyrir fatlað fólk. Þau eiga að vera hvatning til að gera enn betur til innleiðingar á samfélagi sem endurspeglar einkunnarorð ÖBÍ, eitt samfélag fyrir alla. Lokadagur tilnefninga er á morgun - 15. september.

ADHD samtökin bjóða upp á spjallfund í kvöld - miðvikudaginn 14. september. Fundurinn í kvöld er ætlaður fullorðnum með ADHD. Hann verður að Háaleitisbraut 13, í fundarsal á 4.hæð og hefst klukkan 20:30. Drífa Pálín Geirs leiðir fundinn en yfirskrift hans er "Við erum einstök". Allir velkomnir.