Lífið með ADHD - hlaðvarp

Lífið með ADHD

Lífið með ADHD er hlaðvarp ADHD samtakanna sem birtist reglulega á öllum helstu hlaðvarpsveitunum. Hlaðvarpið er í umsjón Bóasar Valdórssonar, sálfræðings og fær hann til sín góða gesti sem miðla af reynslu sinni og þekkingu, ekki síst af lífinu með ADHD. Gleði, sorgir, sigrar og óborganlegar lífsreynslusögur í bland við fróðleik um ADHD. Allt sem þú hélst að þú vissir um ADHD, en vissir í raun ekki...

 

Þáttur 14. Jóhanna Birna Bjartmarsdóttir

 

Jóhanna Birna Bjartmarsdóttir hefur á síðustu misserum vakið þónokkra athygli en hún hélt nýlega fyrirlestra á ráðstefnu BUGL og málþingi ÖBÍ. Í fjórtánda þætti Lífið með ADHD settist hún niður með Bóasi Valdórssyni og þau töluðum um uppvaxtarár hennar og þá baráttu sem hún hefur háð til þess að komast á þann stað sem hún er nú á og þá sigra sem hún hefur náð og hvernig sýn hennar er á menntakerfið. Upptöku af fyrirlestrum hennar og greinar um efnið er að finna á heimasíðu Jóhönnu; https://www.johannabirnabjartmars.com/

 

Þáttur 13. Sólveig Ásgrímsdóttir 

Sólveig Ásgrímsdóttir, sálfræðingur settist niður með Guðna Rúnari Jónassyni verkefnastjóra ADHD samtakanna og ræddu málefni sem er Sólveigu nærri en það er staða eldri borgara með ADHD og athuganir sem hún hefur verið að fást við tengt efninu.

 

Þáttur 12. Anna Tara Andrésdóttir

 

Í þættinum ræðir Bóas Valdórsson við Önnu Töru Andrésdóttur doktorsnema við Háskólann í Barcelona en í rannsóknum sínum leggur hún sérstaka áherslu á konur með ADHD. Anna Tara lauk BS gráðu í sálfræði og viðbótardiplóma í hagnýtri jafnréttisfræði frá Háskóla Íslands, mastersgráðu í rannsóknum í hegðun og hugarstarfsemi frá Háskólanum í Barcelona.

Hún brennur fyrir málefnum ADHD því hún skilur vel hversu mikil áhrif ADHD getur haft á líf fólks. ADHD er meðhöndlanlegasta röskunin sem til er og því er mikilvægt að veita fólki þau bættu lífsgæði sem það eiga skilið.

 

Þáttur 11. Ari H.G. Yates

 

Í glænýjum þætti af Lífinu með ADHD hitti Bóas Valdórsson, sálfræðingur og þáttastjórnandi varpsins Ara H. G. Yates teiknara og rithöfund en hann var í stuttu stoppi hér á landi um daginn. Þeir spjölluðum m.a. um það hvernig það kom til að hann skrifaði bók með ungum vini sínum um dag í lífi drengs með ADHD, bókina ættu margir að þekkja en hún hefur verið þónokkuð vinsæl hjá börnum (og fullorðnum) með ADHD. Einnig spjölluðum þeir um hvernig það kom til að Ari varð teiknari og ýmsar hliðar af ADHD í daglegu lífi. 

Þáttur 10. Gunnar Helgason

Gunnar Helgason barnabókarithöfund og leikari kom í spjall og sagði okkur frá mömmu sinni, facebook rannsóknum sínum og nýju bókinni sinni sem heitir Alexander Daníel Hermann Dawidsson (ADHD): Bannað að eyðileggja sem kom út fyrir jólin og fjallar um Alexander Daníel Hermann Dawidsson sem er með ADHD

 

Þáttur 9. Glowie

Sara Pétursdóttir, betur þekkt undir listamannanafninu Glowie settist niður með Bóas Valdórssyni og ræddu hennar reynslu af því að alast upp með ADHD. Glowie gaf út í síðastliðnum mánuði nýtt lag og myndband sem hún tileinkaði ADHD sem hún kallar sinn ofurkraft. Ekki nóg með að hafa búið til þetta lag þá leikstýrði hún einnig myndbandinu sjálf auk þess að skrifa grein í tónlistartímaritið Clash Magazine og búa til myndasögu um sína reynslu.

 

Þáttur 8. Björn Þorfinnsson, skákmaður og ritstjóri

Lífið með ADHD kemur úr sumarfríi með glænýjan þátt og viðtal við Björn Þorfinnsson skákmann og ritstjóra DV. Björn fékk greiningu á fullorðinsaldri og talar meðal annars um það hvernig hann telur ADHD hafa verið honum styrk í skákinni. Karítas Harpa ræðir við Björn um skólagönguna, áhugamálin og skákina.

Hlaðvarp ADHD samtakanna í umsjón Karitasar Hörpu Davíðsdóttur og Bóas Valdórssyni. Góðir gestir miðla reynslu sinni af lífinu með ADHD. Gleði, sorgir, sigrar og óborganlegar lífsreynslusögur í bland viðfróðleik um ADHD. Allt sem þú hélst að þú vissir um ADHD, en vissir í raun ekki

Þáttur 7. Bóas Valdórsson nýr meðlimur hlaðvarpsins

Að þessu sinni í hlaðvarpsþættinum Lífið með ADHD verður örlítið óhefðbundið spjall milli núverandi og nýs meðlims, og þáttastjórnanda, hlaðvarpsins. Bóas Valdórsson hefur komið að ADHD á mörgum sviðum, unnið með börnum og unglingum og var meðal annars einn af stofnendum sumarbúða fyrir börn með ADHD. Hann gengur nú til liðs við Karitas í þáttunum og spjalla þau um lífið með ADHD og framhald þáttanna.

Þáttur 6. Lífið með ADHD – Móðir barns með ADHD

Erfiðleikar barns með ADHD hafa ekki einungis áhrif á það heldur einnig umhverfið sem barnið lifir og hrærist í dags daglega. Í þessum þætti af Lífið með ADHD fáum við móður barns með ADHD sem glímir m.a. við það að beita ofbeldi. Við heyrum hennar upplifun og reynslu á því að vera móðir í þessum aðstæðum, samskipti við skólayfirvöld og hvað mætti betur fara.

Þáttur 5. Lífið með ADHD – Hildur Kristín Stefánsdóttir

Í þessum þætti af Lífið með ADHD mætir Hildur Kristín Stefánsdóttir tónlistarkona, sem hefur verið áberandi í íslensku tónlistarlífi síðustu árin. Hún fékk greiningu á fullorðinsaldri og við spjöllum um hennar reynslu og upplifanir. 

Þáttur 4. Lífið með ADHD – Hildur Öder og Björgvin Páll

Í þessum þætti af Lífið með ADHD mæta þau Hildur Öder Einarsdóttir og ólympíufarinn Björgvinn Páll Gústavsson. Bæði Hildur og Björgvin hafa stundað íþróttir frá barnsaldri og telja þau íþróttastarfið hafa gert þeim gott. Hildur skrifaði nýverið Meistara ritgerð um ADHD og íþróttir sem hún segir stuttlega og Björgvin Páll segir okkur frá reynslu sinni af lífinu með ADHD, innann vallar og utan. 

Þáttur 3. Lífið með ADHD – Lögreglan og ADHD

Undanfarin ár hafa sprottið reglulega upp umræður um lögregluna og ADHD. Í júlí 2019 var viðmiðum breytt varðandi nám við Mennta- og starfþróunarsetur lögreglunnar. En hvernig er umræðan innan lögreglustéttarinnar? Í þessum þætti af Lífið með ADHD fæ ég annarsvegar rannsóknarlögreglumanninn Hall Hallsson í viðtal til mín og hinsvegar les ég upp orð annars lögreglumanns sem treysti sér ekki til þess að koma fram undir nafni. 

Þáttur 2. Lífið með ADHD - Jón Gnarr og Vilhjálmur Hjálmarsson  

Viðmælendur þáttarins eru tveir að þessu sinni, annar er stjórnarmaður ADHD samtakanna og leikarinn Vilhjálmur Hjálmarsson. Sá síðari á það sameiginlegt með Vilhjálmi að vera leikari (og með ADHD) en það er fyrrum Borgarstjóri og þúsundþjalasmiðurinn Jón Gnarr, hann segir einlæglega frá skólagöngu sinni og síðan hvernig hann meðhöndlar sitt ADHD í dag.

Þáttur 1. Lífið með ADHD – Katrín Júlíusdóttir

Fyrsti viðmælandi seríunnar er fyrrum Alþingiskona, ráðherra og núverandi framkvæmdarstjóri SFF, Katrín Júlíusdóttir. Í þættinum heyrum við hvernig Katrín fékk ADHD greiningu á óhefðbundin hátt og hvernig það breytti lífi hennar til hins betra.