Verkefnið Velferðarnet Suðurnesja hefur gert samning við ADHD samtökin og býður öllum grunnskólum á Suðurnesjum fræðslu fyrir nemendur í 10. bekk. ADHD og allt hitt er yfirskrift fræðslunnar sem leitast við að útskýra hvers vegna þeir sem eru með ADHD glíma við áskoranir í námi og daglegu lífi. Það er mikilvægt að geta sýnt skilning og nýtt sér styrkleika sína til að byggja upp jákvæða sjálfsmynd. Jóna Kristín Gunnarsdóttir grunnskólakennari og hegðunarráðgjafi sér um fræðsluna fyrir hönd ADHD samtakanna. Verkefnið hófst í mars og viðbrögðin verið gríðarlega góð. Í framhaldinu verður svo boðið uppá fræðslu fyrir foreldra um unglinga og ADHD. Hægt er að ganga í ADHD samtökin hér: https://www.adhd.is/is/styrkja/gerast-felagsmadur-adhd

Aðalfundur ADHD samtakanna fór fram miðvikudaginn 19. apríl 2023 í húsakynnum félagsins að Háaleitisbraut 13. Á fundinum var kjörið í stjórn samkvæmt lögum samtakanna, ársreikningar vegna 2022 afgreiddir og ályktað um brýnustu verkefnin fram undan í geðheilbrigðismálum. Varaformaður ADHD samtakanna, Gyða Haraldsdóttir gerði grein fyrir skýrslu stjórnar fyrir árið 2022 í fjarveru formanns og framkvæmdastjórinn, Hrannar Björn Arnarsson gerði grein fyrir ársreiknings félagsins. Árið 2022 var nokkuð tvískipt – fyrri hluti ársins var um margt litaður af takmarkandi þáttum COVID hvað fundahald varðar, en þegar leið á vorið og restina af árinu færðist starfsemin í eðlilegra horf með líflegu viðburðahaldi og starfsemi um allt land. Áframhaldandi vöxtur einkenndi starfsemi samtakanna á árinu. Félagsmönnum fjölgaði úr 3616 í 4086 eða um 13%. Ein skráning gildir fyrir hverja fjölskyldu en bak við þá tölu reynast yfirleitt mun fleiri þar sem ekki er óalgengt að aðrir fjölskyldumeðlimir glími einnig við röskunina. Stóraukið líf færðist í starfsemi útibúanna, námskeiðahald og fræðslustarf samtakanna og mikil áhersla var lögð á baráttuna við lyfjafordóma og fyrir bættri og aukinni þjónustu hins opinbera við greiningar og meðferð vegna ADHD. Samþykkt var að árgjald ADHD samtakanna fyrir næsta starfsár yrði óbreytt, kr. 3650,- eða 10 kr fyrir hvern dag ársins og verða kröfur vegna árgjaldsins stofnaðar í heimabanka félagsfólks. Árgjaldið mun áfram veita umtalsverðan afslátt af námskeiðum samtakanna, af vörum í vefverslun ofl. Í samræmi við lög samtakanna var kjörið í helming stjórnarsæta, sæti formanns, varaformanns eins sætis í aðalstjórn og eitt sæti varamanns, til ársins 2025, en stjórn ADHD samtakanna skipa sjö aðalmenn og tveir til vara. Stjórnin er nú þannig skipuð: Vilhjálmur Hjálmarsson, formaður (kosin til aðalfundar 2025) Gyða Haraldsdóttir, varaformaður (kosinn til aðalfundar 2025) Elín Hrefna Garðarsdóttir, gjaldkeri (kosin til aðalfundar 2024) Tryggvi Axelsson, ritari (kosin til aðalfundar 2024) Sigrún Jónsdóttir, meðstjórnandi (kosin til aðalfundar 2024) Bóas Valdórsson, meðstjórnandi (kosin til aðalfundar 2025) Ása Ingibergsdóttir, meðstjórnandi (kosin til aðalfundar 2024) Varamenn: Björn S.. Traustason, (kosin til aðalfundar 2024) Bergþór Heimir Þórðarson, (kosin til aðalfundar 2025) Nefang stjórnar er: stjorn@adhd.is Ályktun aðalfundar ADHD samtakanna, 19. apríl 2023. Á þessu ári fagna ADHD samtökin 35 ára starfsafmæli sínu undir yfirskriftinni Betra líf með ADHD í 35 ár. Á þessum 35 árum hafa samtökin vaxið og dafnað og í dag eru rúmlega 4100 fjölskyldur skráðar í samtökin. Hvergi í heiminum er stærra hlutfall landsmanna virkt í hagsmunasamtökum fólks með ADHD og mjög fá samtök hafa fleiri félagsmenn almennt. Samtökin geta litið afar stolt yfir farinn veg, enda hafa lífsskilyrði fólks með ADHD tekið stakkaskiptum á starfstíma samtakanna, fordómar vikið fyrir þekkingu og stuðningur og skilningur aukist í samfélaginu á flestum sviðum. En betur má ef duga skal og enn eru mörg brýn verkefni framundan. Barátta ADHD samtakanna á liðnum árum hefur skilað því að allt þjónustukerfi hins opinbera við greiningar og meðferð á ADHD var tekið til endurskoðunar undir lok árs 2021. Þeirri endurskoðun fylgdu fögur fyrirheit um styttingu biðlista og aukinn meðferðarstuðning og hefur liðið ár mikið farið í að fylgja þessum breytingum og fögru fyrirheitum eftir. Árangurinn hefur ekki verið sem skyldi og hafa biðlistar því miður ekkert styst. Þvert á móti hafa þeir lengst og biðtími sömuleiðis, bæði hjá fullorðnum og börnum. Nýtt ADHD teymi fyrir fullorðna hefur nokkuð haldið í horfinu, en vegna aukinnar eftirspurnar hefur biðtími eftir þjónustu enn ekki styst. Hjá nýrri Geðheilsumiðstöð barna, sem tók yfir starfsemi Þroska- og hegðunarstöðvar, hefur hinsvegar keyrt um þverbak og biðtími lengst verulega. Óhætt er að segja að nú er tími umþóttunar og undirbúnings liðinn og tími róttækra aðgerða runninn upp – og þó fyrr hefði verið! ADHD samtökin geta ekki sætt sig við að enn eitt árið líði án þess að verulega verði gefið í af hálfu hins opinbera í þjónustu við fólk með ADHD. Biðlistar í greiningar og meðferð vegna ADHD verða að styttast og biðtíminn að breytast úr þeim tveimur til þremur árum sem hann er í dag, í 4-8 mánuði að hámarki. Allt annað er í raun ólíðandi, miðað við þá þekkingu sem við höfum í dag um skaðsemi langs biðtíma og jákvæðan ávinning greiningar og meðferðar vegna ADHD. Aðalfundur ADHD samtakanna heitir á stjórnvöld að láta nú hendur standa fram úr ermum svo um munar. ADHD samtökin munu fylgjast með hverju skrefi á þeirri mikilvægu vegferð.

Á þessu ári fagna ADHD samtökin 35 ára starfsafmæli sínu undir yfirskriftinni Betra líf með ADHD í 35 ár. Á þessum 35 árum hafa samtökin vaxið og dafnað og í dag eru rúmlega 4100 fjölskyldur skráðar í samtökin. Hvergi í heiminum er stærra hlutfall landsmanna virkt í hagsmunasamtökum fólks með ADHD og mjög fá samtök hafa fleiri félagsmenn almennt. Samtökin geta litið afar stolt yfir farinn veg, enda hafa lífsskilyrði fólks með ADHD tekið stakkaskiptum á starfstíma samtakanna, fordómar vikið fyrir þekkingu og stuðningur og skilningur aukist í samfélaginu á flestum sviðum. En betur má ef duga skal og enn eru mörg brýn verkefni framundan. Barátta ADHD samtakanna á liðnum árum hefur skilað því að allt þjónustukerfi hins opinbera við greiningar og meðferð á ADHD var tekið til endurskoðunar undir lok árs 2021. Þeirri endurskoðun fylgdu fögur fyrirheit um styttingu biðlista og aukinn meðferðarstuðning og hefur liðið ár mikið farið í að fylgja þessum breytingum og fögru fyrirheitum eftir. Árangurinn hefur ekki verið sem skyldi og hafa biðlistar því miður ekkert styst. Þvert á móti hafa þeir lengst og biðtími sömuleiðis, bæði hjá fullorðnum og börnum. Nýtt ADHD teymi fyrir fullorðna hefur nokkuð haldið í horfinu, en vegna aukinnar eftirspurnar hefur biðtími eftir þjónustu enn ekki styst. Hjá nýrri Geðheilsumiðstöð barna, sem tók yfir starfsemi Þroska- og hegðunarstöðvar, hefur hinsvegar keyrt um þverbak og biðtími lengst verulega. Óhætt er að segja að nú er tími umþóttunar og undirbúnings liðinn og tími róttækra aðgerða runninn upp – og þó fyrr hefði verið! ADHD samtökin geta ekki sætt sig við að enn eitt árið líði án þess að verulega verði gefið í af hálfu hins opinbera í þjónustu við fólk með ADHD. Biðlistar í greiningar og meðferð vegna ADHD verða að styttast og biðtíminn að breytast úr þeim tveimur til þremur árum sem hann er í dag, í 4-8 mánuði að hámarki. Allt annað er í raun ólíðandi, miðað við þá þekkingu sem við höfum í dag um skaðsemi langs biðtíma og jákvæðan ávinning greiningar og meðferðar vegna ADHD. Aðalfundur ADHD samtakanna heitir á stjórnvöld að láta nú hendur standa fram úr ermum svo um munar. ADHD samtökin munu fylgjast með hverju skrefi á þeirri mikilvægu vegferð. Aðalfundur ADHD samtakanna 19. apríl 2023

Síðastliðinn fimmtudag héldu ADHD samtökin uppá 35 ára afmæli sitt með pompi og prakt í Gyllta salnum á Hótel Borg. Katrín Jakobsdóttir, forsætisráðherra ávarpaði gesti og tónlistarmaðurinn Eyþór Ingi tróð upp. Grínarinn og ísgerðarkonan Anna Svava Knútsdóttir sá um að stýra viðburðinum með glæsibrag. Katrín Jakobsdóttir og Vilhjálmur Hjálmarsson, formaður ADHD samtakanna veittu síðan eftirtöldum aðilum heiðursviðurkenningu fyrir ómetanlegt framlag þeirra í þágu fólk með ADHD. Viðurkenninguna hlutu Matthías Kristiansen og Heidi Kristiansen, Ingibjörg Karlsdóttir, Elín Hoe Hinriksdóttir og Björk Þórarinsdóttir heitin. Ingibjörg Karlsdóttir tók á móti viðurkenningu Matthíasar og Heidi í fjarveru þeirra og Alexander Kristinsson tók á móti viðurkenningu fyrir hönd móður sinnar Bjarkar Þórarinsdóttur en öll voru þau í forystu samtakanna og bera mikla ábyrgð á velgengni þeirra í dag. Afmælisdagurinn er þó aðeins hluti af stærri dagskrá á þessu afmælisári en í sumar munu samtökin bjóða félagsfólki til veislu í Fjölskyldu- og Húsdýragarðinum. Auk þess standa ADHD samtökin fyrir alþjóðlegri ráðstefnu 26. og 27. október undir yfirskriftinni „Betra líf með ADHD“. Fyrir Páska gáfu samtökin einnig út afmælisrit sem hægt er að nálgast hér. https://www.adhd.is/static/files/Frettabref/pdf/afmaelisrit.pdf Hér er hægt að skoða myndabanka frá viðburðinum: https://www.picdrop.com/ellephoenix/XuP44nPxBr

Vertu Snillingur! Í tilefni af 35 ára afmæli ADHD samtakanna fá allir nýjir Snillingar stuttermabol að gjöf með mynd sem hönnuð er af Hjalta Parelíus myndlistarmanni fyrir ADHD samtökin. Skráðu þig núna og gerum ADHD samtökin enn öflugari á 35 ára afmælisárinu!

Þann 7. apríl verða 35 ár liðin frá stofnun ADHD samtakanna. ADHD samtökin munu með ýmsum hætti fagna tímamótunum undir yfirskriftinni Betra líf með ADHD í 35 ár. Næstu daga mun afmælisriti ADHD samtakanna verða dreift um allt land, stútfullu af fróðleik um starfsemi samtakanna ásamt áhugaverðum viðtölum við fjölda einstaklinga. Um leið og við óskum þér og þínum til hamingju með 35 ára starfsafmælið gefum við formanni samtakanna, Vilhjálmi Hjálmarssyni orðið...

Á þessum spjallfundi munu Anna Elísa Gunnarsdóttir félagsráðgjafi MA, og eiginmaður hennar, Arnór Heiðarsson aðstoðarskólastjóri, deila reynslu sinni af ADHD í parasambandinu. Ýmsum spurningum verður velt upp eins og: -Hvaða áskoranir mæta pari þegar annar aðilinn er með ADHD en hinn ekki? -Hvernig er hægt að takast á við þær áskoranir til að eiga farsælt parasamband? Farið verður yfir hvernig einkenni ADHD geta haft áhrif á pör þar sem annar aðilinn er með ADHD en hinn ekki, hverjar helstu áskoranirnar í samskiptum og verkaskiptingu heimilisins eru og hvernig hægt er að takast á við þær áskoranir. Í lok fundarins verða opnar umræður. Fræðslan er einkum ætluð pörum þar sem annar aðilinn er með ADHD en hinn ekki, og eru pör hvött til að mæta saman. Fræðslufundurinn fer fram 9. maí kl. 20:00 - 21.00 í húsakynnum ADHD samtakanna Háaleitisbraut 13, 108 Reykjavík á fjóðru hæð. Heitt á könnunni. Einnig er honum streymt á ADHD í beinni á Facebook fyrir skráða meðlimi samtakanna. Hægt er að skrá sig á viðburðinn hér til að fá áminningu um hann: https://fb.me/e/2mWQeA7Vz Hér er tengill til að skrá sig í samtökin: https://www.adhd.is/is/styrkja/gerast-felagsmadur-adhd Verið velkomin á fræðslufundinn!

Nú eru síðustu forvöð að skrá sig á Áfram Stelpur! námskeiðið sem er nú í apríl, námskeiðið er það síðasta fyrir sumarið og verður ekki aftur fyrr en í haust. Kennt er í fjórum lotum miðvikudagana 12, 19, 26 apríl og 3. maí frá 17:00 og 19:30. Markmið námskeiðs: Námskeiðinu er ætlað að veita fræðslu um ADHD einkenni kvenna, algengar fylgiraskanir þeirra og ólíkar birtingarmyndir röskunarinnar. Áhersla er lögð á þau hugrænu ferli sem liggja að baki algengum áskorunum sem einstaklingar með ADHD mæta í daglegu lífi, hvort sem er í námi, starfi, heimilislífi, félagslegum samskiptum eða uppeldi. Markmið námskeiðsins er að styrkja konur með ADHD í markmiðasetningu, áætlanagerð og skipulagi með það fyrir augum að draga úr streitu og vanmáttarkennd. Námskeiðinu er ætlað að fræða konur um ýmis verkfæri sem nýst geta í þessum tilgangi og veita þjálfun í notkun þeirra í gegnum samtöl og verkefnavinnu. Námskeiðið verður í húsnæði ADHD samtakanna að Háaleitisbraut 13, 4. hæð. Leiðbeinendur verða Dr. Drífa Björk Guðmundsdóttir sálfræðingur og Elín H. Hinriksdóttir sérkennari.

Á morgun þriðjudaginn 21. mars ætla Tinna Tómasdóttir og Lovísa Jóhannsdóttir talmeinafræðingar að fræða okkur um málþroskaröskun barna. Málþroskaröskun DLD er dulin skerðing og kemur snemma fram hjá börnum og viðhelst fram á fullorðinsár. Málþroskaröskun DLD er algeng og sýna rannsóknir að eitt af hverjum 14 börnum glími við einkenni DLD. Málþroskaröskun DLD kemur oft fram samhliða öðrum röskunum t.d. ADHD, lesblindu eða námserfiðleikum. Einkenni DLD og ADHD eru oft svipuð og skarast og því getur stundum verið erfitt að átta sig á hvað er hvað. Vonumst til að sjá sem flesta – málþroskaröskun DLD og ADHD viðkemur okkur öllum. Hægt er að skrá sig á viðburðinn hér til að fá áminningu um hann: https://fb.me/e/12zVpYrS6 Hér er tengill til að skrá sig í samtökin: https://www.adhd.is/is/styrkja/gerast-felagsmadur-beintengt

Er erfitt að fá barnið til að fylgja fyrirmælum og skapa ramma og rútínu? Börn með ADHD eiga iðulega erfitt með að skilja og fylgja eftir munnlegum fyrirmælum en hafa þess í stað sjónræna styrkleika. Þegar þjálfa á daglegar venjur og fá barnið til að fylgja þeim getur sjónrænt skipulag komið að góðum notum. Katrín Ruth Þorgeirsdóttir ráðgjafaþroskaþjálfi og hegðunarráðgjafi fer yfir nokkrar aðferðir og leiðir sem hægt er að nota til að kenna, þjálfa og styðja við daglegar rútínur. Fundurinn fer fram nú á miðvikudaginn, 22. mars næstkomandi og hefst klukkan 20:00. Fundurinn fer fram í austurrými Vallaskóla, Sólvöllum 2. Gengið inn af Engjavegi Hér er tengill til að skrá sig í samtökin: https://www.adhd.is/is/styrkja/gerast-felagsmadur-beintengt