ADHD samtökin tilnefnd til Samfélagsverðlauna Fréttablaðsins

Björk Þórarinsdóttir og Ellen Calmon /MYND:GVA

ADHD samtökin eru tilnefnd í ár til Samfélagsverðlauna Fréttablaðsins í flokknum "Til atlögu gegn fordómum". Í umsögn dómnefndar segir:

"ADHD-samtökin fagna aldarfjórðungsafmæli á árinu. Markmið samtakanna er að börn og fullorðnir með athyglisbrest og skyldar raskanir njóti sannmælis í samfélaginu og fái þjónustu sem stuðlar að bættum lífsgæðum. Samtökin vinna mikilvægt starf þegar kemur að börnum og unglingum með ofvirkni og athyglisbrest. Fræðslufundir samtakanna eru jafnan mjög vel sóttir en auk þess standa samtökin fyrir námskeiðshaldi af ýmsu tagi og útgáfu fræðsluefnis."

Samfélagsverðlaun Fréttablaðsins verða veitt næsta miðvikudag, 17. apríl og er þetta í áttunda sinn sem verðlaunin eru veitt. Tilgangur verðlaunanna er að vekja athygli á einstaklingum og verkefnum sem geta verið öðrum til fyrirmyndar. Lesendur Fréttablaðsins tóku þátt í að tilnefna til verðlaunanna og bárust á fjórða hundrað tilnefningar. Dómnefnd vann úr tilefningunum og er niðurstaðan kynnt í Fréttablaðinu í dag, laugardag 13. apríl.

Sjá frétt Fréttablaðsins um Samfélagsverðlaunin